’’دشمن جائداد قانون‘‘ Enemy Property Act 1968،  اگست ۱۹۶۸ میں  لاگو ہوا۔ اصل میں ۱۹۶۵میں پاکستان سے جنگ کے پس منظر میں Defence of India Rules 1971 کے تحت بنے Custodian of Enemy Property کے سلسلے میں اس ایکٹ کو لایا گیا تھا۔ یہ ایکٹ ایک عبوری قانون تھا اور ایک خاص مقصد کے لئے بنا تھا جو اصل مالک (یا اس کے وارث) کو اس کے حق سے محروم نہیں کرتا اورگورنمنٹ کو اس کا مالک نہیں بناتا۔ تاہم Custodian of Enemy Propertyکے محکمہ میں زبردست دھاندلیاں اور بے اعتدالیاں ہیں جن کے باعث عملاًاصل مالکوں سے زیادہ اسے اختیار ملے ہوئے ہیں۔ یاد رہے کہ کیمبریج یونیورسٹی کے پروفیسر جیا چیٹرجی کا کہنا ہے کہ یہ شعبہ بدعنوانیوں اور بے ایمانیوں کا گڑھ ہے۔

۱۵ نومبر ۲۰۱۰ میں لوک سبھا میں ایک ترمیمی بل بعنوان The Enemy Property (Second Bill, 2010) (Bill No. 126 of 2010) Amendment and Validatorکے ذریعہ مذکورہ ایکٹ کا حلیہ ہی بدلنے کی کوشش کی جارہی ہے:

مذکورہ بالا ایکٹ (ملاحظہ ہو سیکشن نمبر ۸) کا مقصد تھا کہ’’ دشمن‘‘ کی جائداد کا تحفظ اورنظم و انصرام کیا جائے۔سیکشن ۲ (B) میں’’دشمن‘‘ Enemy کی جو تعریف کی گئی ہے اس کے مطابق ہندوستان کا کوئی باشندہ اس میں نہیں آتا۔موجودہ Enemy Property Amendment Bill بنیادی طور پر اس ایکٹ کی اساس کو ہی بدلنا چاہتاہے۔ اس سے ۱۹۷۵، ۱۹۷۶، ۱۹۸۱ اور ۱۹۹۱ میں دیے گئے کلکتہ ہائی کورٹ کے فیصلوں کی نفی ہوجاتی ہے۔ وہ درخواست گزار جو اپنی جائدادوں کے دہائیوں سے مالک چلے آرہے ہیں ، وہ بغیر کسی واضح وجہ کے ان سے محروم ہوجائیں گے۔ اہم پہلو یہ ہے کہ مذکورہ ایکٹ کے سیکشن (۲) میں ترمیم نہیں ہو سکتی کیونکہ وہ انڈیا کے کسی باشندہ پر لاگو نہیں ہوتا۔ ترمیم کے لئے جو بل پیش کیا گیا ہے وہ ایکٹ کے سیکشن (۵) میں ترمیم کرنا چاہتاہے اور ایک ذیلی شق (۳) کے ذریعہ چاہتا ہے کہ جائداد کی ملکیت Custodian کو دیدی جائے۔ اس سے معزز سپریم کورٹ کیے فیصلہ کی نفی ہوتی ہے۔ سپریم کورٹ نے کہا تھا کہ باوجود اس کے کہ (۱) دشمن شہریت بدل جانے سے دشمن نہیں رہا، یا (۲) اس کا قانونی وارث ایک ہندوستانی ہے، یا (۳) وہ دشمن ملک کا باشندہ نہیں پھر بھی جائداد Custodian کے ہاتھ میں رہے گی اور اسے اس سے تمام فائدے اور حقوق حاصل ہوں گے۔

یو ں تو مذکورہ ایکٹ کا سیکشن نمبر ۱۰ ہی Custodian کو جائداد کے فروخت کا سرٹیفیکیٹ جاری کرنے کا حق، رجسٹریشن کا حق وغیرہ سارے اختیارات اس حد تک دیتا ہے کہ اصل مالکین کے اختیارات کی نفی ہوجاتی ہے۔ اس کے باوجود ترمیمی بل یہ چاہتا ہے کہ Custodian کو ویسا ہی قانونی اختیار دیا جائے جو سِول کورٹ کو حاصل ہوتاہے۔ اس کی رو سے وہ (۱) دستاویزات کی تلاش و معائنہ (۲) حسابات وغیرہ کی تیاری (۳) دستاویزات کے معائنہ کے لئے کمیشن بھیجنے (۴) گواہوں کی حاضری اور حلف لیتے وقت ان کے جائزہ کے اختیار کا مالک بن جائے گا۔

اگر یہ ترمیمی بل پاس کر دیاگیا تو اس قانون کے نفاذ کے بعد کوئی بھی شخص ’’دشمن جائداد‘‘ Enemy Property کے سلسلہ میں کسی بھی قانونی کارروائی کرنے کے حق سے محروم کردیاجائے گا اور ہندوستان کا باشندہ ہونے کے باوجود حق وراثت اور حق ہبہ وغیرہ سے متعلق معاملات کو کسی عدالت میں نہیں لاسکے گا۔

یہ جارحانہ اور ظالمانہ قانون دراصل عدالت علیا یعنی سپریم کورٹ کے فیصلے اور دیگر ہائی کورٹوں کے فیصلوں کو انتظامیہ کے ذریعے کا لعدم کرنے کی ایک مذموم حرکت ہے اور ساتھ ہی ماضی میں ہوئی بددیانتی اور بے ایمانی پر پردہ ڈالنے کی کوشش ہے۔ خدانہ کردہ اگر یہ مجوزہ قانون باقاعدہ قانون کی شکل اختیار کرلیتا ہے تو اس سے بد عنوانیوں اور بی ایمانیوں کے ایک عظیم سلسلے کا آغاز ہوجائے گا۔Enemy Property Act 1968 کو بنے ہوئے بیالیس سال ہوگئے اور اب (۴۲) بیالیس برس کے بعد اس ایکٹ کے ترمیم کرنے کی کیوں ضرورت محسوس کی گئی۔ حقیقت یہ ہے کہ ’’سپریم کورٹ‘‘ میں راجہ محمود ابادکے حق میں فیصلے کے بعد بہت سے لوگوں کو عدالت سے انصاف ملنے کی امیدیں بڑھیں۔ یہ مجوزہ قانون ان سب لوگوں کی محنتوں اور حقوق کو رائگاں کرنے اور ان کی جائدادوں کو ہڑپنے کے ارادے سے لوک سبھا میں لایا گیا ہے۔

یہ مجوزہ قانون نہ صرف ہندوستان کے مسلمانوں کو نشانہ بنا کر ان کے حقوق سے انھیں محروم رکھنا چاہتاہے بلکہ اس قانون کے نفاذ کے بعد کوئی شخص عدالت میں اس معاملے (یعنی Enemy Property )کے سلسلے میں قانونی کارروائی کرنے کے حق سے بھی محروم کردیا جائے گا اور ہندوستان کا باشندہ ہونے کے باوجود حق وراثت اور حق ہبہ وغیرہ کے قوانین کسی عدالت میں نہیں لا سکے گا۔ اس نفاذ کے بعد ایک ایسی نظیربن جائے گی کہ کسی وقت بھی ملک کی سا لمیت و تحفظ کا بہانہ بناکر مسلمانان ہند کے لئے پریشان کن قوانین بنائے جانے کا جوزبن جائے گا۔

اس مجوزہ قانون کے تحت بظاہر راجہ محموداباد کے لئے ذاتی طور پر کچھ رعایتیں رکھی گئیں ہیں لیکن غریب اور بیکس مسلمانوں کے لئے زحمتوں اور مشاکل کے ایک نئے باب کا آغاز بھی اس میں پوری طرح مضمر ہے۔
اس مجوزہ قانون کو پارلیمنٹ کی اسٹینڈنگ کمیٹی برائے امور داخلہ کے حوالہ کر دیا گیا جس کے سربراہ جناب ونکیا نائڈو (ممبر راجیہ سبھا ۔بی جے پی) ہیں۔ اس کمیٹی نے عوام سے درخواست کی ہے کہ تحریری طور پر اپنی رائے اور اعتراضات سے اُسے ۱۵ مارچ ۲۰۱۱ تک مندرجہ ذیل پتہ پر باخبر کریں:

Shri D.K. Mishra
Jt. Director, Rajya Sabha Secretariat
Room #142, 1st Floor, Parliament House Annex, New Delhi- 1
Tel: 011-23035410, Fax: 011-23012007
Email: rsc-ha@sansad.nic.in, Website: http://rajyasabha.nic.in

مذکورہ بل کا مسودہ راجیہ سبھا کی ویب سائٹ http://rajyasabha.nic.in پر موجود ہے۔ یہ ساری  تفصیلات ملی گزٹ کی وبسایٹ : www.milligazette.com پر موجود ہیں ۔